भिगवण मधील जनतेचा संताप: रस्त्यावरील खड्डयात झाडे लावून निषेध

1 year ago Admin

भिगवण मधील जनतेचा संताप: रस्त्यावरील खड्डयात झाडे लावून निषेध

भिगवण प्रतिनिधी

आप्पासाहेब गायकवाड

भिगवण मधील जनतेचे २०१५ मध्ये वीस वर्षाची सत्ता उलथवून राष्ट्रवादी काँग्रेस पुरस्कृत उमेदवारांना बहुमताने निवडून दिले. परंतु सत्तेच्या सारीपाटात निवडुन आलेल्या उमेदवारांना जबाबदारीचे व कर्तव्याचे भान न राहता सरपंच,उपसरपंच पदाची खुर्ची मिळवण्यात च समाधान दिसले.त्यामुळे या पाच वर्षांमध्ये सत्ताधाऱ्यांकडून कामे झाल्याचा दावा होत असला तरीही भिगवण मधील काही रस्त्यांची दुरावस्था झालेली आहे.

राज्यमंत्री दत्तात्रय भरणे तसेच जि. प.पुणे चे माजी बांधकाम व आरोग्य सभापती प्रवीण माने यांच्या माध्यमातून रस्त्यासाठी भिगवण करिता लाखो रुपयाचा निधी मिळून सुद्धा रस्त्यांच्या कामाच्या दर्जाबाबत संशय व्यक्त केला जात आहे,कारण रस्त्याची केलेली कामे ही निकृष्ट दर्जाची झालेली असून आत्ताच झालेल्या पावसामध्ये बऱ्याच ठिकाणी रस्ता वाहून गेला, तर कुठे रस्त्यावरील खडी दिसू लागली,रस्त्यांना भेगा पडल्या आहेत. अशा एक ना अनेक समस्या दिसून येत आहेत.

त्यामुळे भिगवण येथील जागृत युवकांनी श्रीनाथ चौकामध्ये रस्त्यावर पडलेल्या खड्ड्यात वृक्षारोपण करून जाहीर निषेध व्यक्त केला आणि आपला संताप याद्वारे त्यांनी जाहीर केला.

यावेळी अमितकुमार वाघ, राहुल गाडे, सचिन पवार, रोहित गाडे, रोहित भरणे, गणेश कदम, ताेफिक शेख, सुलतान मुलाणी, हुसेन मुलाणी, सुरज गाडे, विशाल गाडे, अजय गुणवरे, अक्षय भरणे, अभिजीत भरणे, ऋतीक गुणवरे, अतुल गाडे, मुन्ना शेख उपस्थित होते.

भिगवण येथील रस्त्यांच्या झालेल्या कामाबाबत जनता असमाधानी असून,रस्त्याचा दर्जा निकृष्ट आहे,त्याचबरोबर रस्त्यावर खड्डे पडले असून ग्रामपंचायत पदाधिकारी याकडे दुर्लक्ष करत आहेत आणि रस्त्यावर टाकण्यात आलेला मुरूम देखील निकृष्ट दर्जाचा असल्यामुळे रस्ता वर आणि लोकांची घरे खाली असा प्रकार झालेला आहे. या सर्व घटनेचा निषेध म्हणून आम्ही खड्ड्यांमध्ये वृक्षारोपण केलेले आहे. यामुळे तरी सत्ताधाऱ्यांना जाग येईल अशी अपेक्षा आहे.

अमित वाघ, राष्ट्रीय नेटबॉल खेळाडू, भिगवण.