ब्रेकिंग न्युज

विद्यार्थी हा शिक्षणाचा गाभा,त्यासाठी गुणवत्तापूर्ण शिक्षण महत्त्वाचे: सी.ई.ओ.आयुष प्रसाद; क्षीरसागर विद्यालयात गुणवत्तापूर्ण शिक्षण प्रशिक्षण कार्यक्रमाचे आयोजन

12 months ago Maharashtra Headlines

भिगवण प्रतिनिधी:

विद्यार्थी हा शिक्षणाचा गाभा असून त्यासाठी गुणवत्तापूर्ण शिक्षण महत्त्वाचे आहे,
शिक्षणाच्या प्रवाहातील सर्वच घटकांनी विद्यार्थी केंद्रबिंदू मानून गुणवत्तापूर्ण व दर्जेदार शिक्षण दिल्याशिवाय विद्यार्थ्यांचा सर्वांगीण विकास होऊ शकणार नाही,यासाठी सर्वात महत्वाचा घटक म्हणजे केंद्रप्रमुख हेच आहेत.असे प्रतिपादन पुणे जिल्हा परिषदेचे मुख्य कार्यकारी अधिकारी आयुष प्रसाद यांनी केले.
येथील क्षीरसागर विद्यालयामध्ये पंचायत समिती इंदापूर व जिल्हा परिषद पुणे यांच्या संयुक्त विद्यमाने इंदापूर,बारामती,दौंड या तालुक्यातील केंद्रप्रमुख यांच्यासाठी,विद्यार्थ्यांच्या सर्वांगीण विकासासाठी गुणवत्तापूर्ण शिक्षण प्रशिक्षण शिबिराचे आयोजन करण्यात आले होते. यावेळी त्यांनी सांगितले की,विद्यार्थ्यांच्या सर्वांगीण विकासासाठी केंद्रप्रमुखांची महत्वाची जबाबदारी असून त्यांनी विशेष लक्ष देऊन मुख्याध्यापकांमार्फत विद्यार्थ्यांचा शारीरिक,मानसिक, बौद्धिक असा सर्वांगीण विकास साधला पाहिजे.

केंद्रप्रमुखांनी आपल्या कर्तव्य व जबाबदाऱ्या समजून, विद्यार्थ्यांच्या सर्वांगीण विकासासाठी नियोजन करताना त्यांची मानसिकता समजून घेणे,विद्यार्थ्यांना प्रेरणा देणे, त्यांना प्रबलन देणे,त्यांच्या अडीअडचणी समजून घेणे व त्या सोडवण्यासाठी प्रयत्न करणे या सर्व बाबी विचारात घेणे गरजेचे आहे.तसेच पुणे जिल्ह्यामध्ये गुणवत्तेच्या बाबतीत इंदापूर तालुका अग्रेसर असल्याचेही त्यांनी सांगितले.

गटशिक्षणाधिकारी, विस्ताराधिकारी व केंद्रप्रमुख यांचे कर्तव्य,जबाबदारी व अधिकार याबाबतही त्यांनी मार्गदर्शन केले.

तसेच त्यांनी भिगवन शिक्षण प्रसारक मंडळाच्या संपूर्ण शैक्षणिक संकुलाची पाहणी करून विद्यालयाची इमारत, भौतिक सोयी सुविधा,निसर्गरम्य परिसर याबाबत समाधान व्यक्त केले व शुभेच्छा देऊन आभार मानले.
यावेळी संस्थेचे संस्थापक अध्यक्ष अजित क्षीरसागर यांनी ‘सचिन तेंडुलकर,प्लेइंग इट्स माय वे’ हे पुस्तक भेट देऊन मुख्य कार्यकारी अधिकारी आयुष प्रसाद यांचा सन्मान केला.

कार्यक्रमाच्या प्रास्ताविकामध्ये केंद्रप्रमुख नानासाहेब दराडे यांनी इंदापूर तालुक्यातील गुणवत्तापूर्ण शिक्षणाचा व त्यासाठी राबविलेल्या विविध उपक्रमांचा अग्रलेख मांडला.

या शिबिरासाठी विजय परीट,गटविकास अधिकारी इंदापूर,तसेच राजकुमार बामणे,गटशिक्षणाधिकारी इंदापूर,भिगवन शिक्षण प्रसारक मंडळाचे संस्थापक अध्यक्ष अजित क्षीरसागर, केंद्रप्रमुख नानासाहेब दराडे, देवानंद शेलार, विद्यालयाचे प्राचार्य तुषार क्षीरसागर प्रा.अविनाश गायकवाड उपस्थित होते.