ब्रेकिंग न्युज

भिगवण परिसरात झालेल्या पाऊसामुळे झेंडू, ऊस शेतीचे नुकसान

4 months ago Maharashtra Headlines

भिगवण प्रतिनिधी:

भिगवण येथील परिसरात अचानक झालेल्या वादळी पावसाने पिकांचे मोठे नुकसान झालेले आहे. काढणीस आलेला सोयाबीन झेंडू तसेच ऊसाच्या इतर पिकाचे नुकसान झाल्याचे दिसून येत आहे. ४ ऑक्टोबर रोजी रात्री वादळी वाऱ्यासह झालेल्या पाऊसामुळे मोठे नुकसान झाले. महाबँक ग्रामीण विकास केंद्रांमधील नोंदीनुसार सदर दिवशी ६५ मिलिमीटर पाऊस पडला. एक ऑक्टोबर रोजी ६६ मिलिमीटर पाऊस पडलेला होता. आठवड्यात दोनदा झालेला पाऊस आणि पाऊस परतीच्या दिशेने असलेले वादळी वारे यामुळे अनेक ठिकाणी नुकसान झाल्याचे दिसून आले आहे.

डिकसळ तक्रारवाडी मदनवाडी (ता. इंदापूर) या गावांमध्ये असलेल्या झेंडू, सोयाबीन पिकांसह उशिरा लागवड केलेल्या उसाचे सुद्धा नुकसान झाल्याचे दिसते. नवरात्र आणि दिवाळीच्या उद्देशाने लावलेले आणि तोडणी सुरु झालेले झेंडूचे पीक वादळी पावसाने शेतकरी सुनिल काळंगे यांच्या हातातुन गेले आहे. डिकसळ येथील एका शेतकऱ्याच्या घरावरील पत्रे उडून गेल्याची घटना घडली आहे. अशा परिस्थितीत शासनाने पंचनामे करून नुकसानीचा आढावा घेऊन शेतकऱ्यांना दिलासा देण्याची अपेक्षा सामान्य शेतकरी वर्गाकडून केली जात आहे.

गेल्या काही वर्षांपासून ऑक्टोबर महिना हा वादळी वाऱ्यासह अतिवृष्टी साठी ओळखला जात आहे. मागील वर्षी १४ ऑक्टोबर २०२० रोजी झालेल्या २०२ मि.मी. अतिवृष्टीने भिगवण गावातील वसाहती भागासह लगतच्या गावांमध्ये पिकांचे मोठे नुकसान झाले होते. मदनवाडी (ता . इंदापूर) येथे तर ओढ्या लगतची शेतजमीन पिकासह वाहून गेल्याचा प्रकार झाला होता. १७ ऑक्टोबर २०१९ रोजी एकाच दिवशी ७९ मिलिमीटर पाऊस झाला होता व त्या वेळी सुद्धा शेतीचे नुकसान झाले होते. यावर्षी ऑक्टोबर महिन्याच्या पाच दिवसांमध्ये १३० मिलिमीटरपेक्षा अधिक पाऊस झालेला आहे.